Psa 64 | TUCT | STEP | Mbouŋ to David O Maaron, yau nataŋ rarai ghom naghe uul ghau. Ulooŋ aliŋag tane, ve upoon ghau pa koiagŋa. Pasaa, yes tigham ghau naroi kat.

Psalms 64

Ŋeer ee ighason Maaron to ipoona pa koiŋa

Mbouŋ to David

1 O Maaron, yau nataŋ rarai ghom naghe uul ghau.
Ulooŋ aliŋag tane, ve upoon ghau pa koiagŋa.
Pasaa, yes tigham ghau naroi kat.

2 Zeran sasaghati tilup zi ve tiliil eez to tivaghamun ghau.
Upaghau ghau pazi: Mako pale tivaghamun ghau.
3 Saveeŋ tau tisiksiki payau ne, poia mako.
Yamazi, ene imin mbuzaagh tau tipoti le maata kat.
Saveeŋ tau tiŋgalŋgali payau ne, ene imin paneegh natŋa tau tikum gabua lilia ila.

4 Yes tiyoŋyooŋ, ve tisasaŋan yes tau lezi sosor mako na.
Ve saawe tau tilam peria, mako rekia ve tivanegh zi.
Pasaa, yes tiroi pa gabua eta mako.

5 Yes tipapazaagh tauzi pa ghamuuŋ ŋgar sasaghati.
Ve tivasavo zi pa nugh sindei tau pale tiŋgooz liis toozi pani ve tisaghav tamtamon. Ve tighe:
“Ŋgar tau taghe taghamu ne, sei pale iwataghi?”

6 Yes tiil eez pa ŋgar saghati tau tighe tighamu, ve tipait tauzi tighe:
“Yei nirau kat pa ŋgar! Tauvene ŋgar to nighe nighamu, ene pale ighur.”
Oyai, iit tamtamon, taŋgooz ŋgar sasaghati naol ila loloon!
7 Eemon Maaron pale ivanegh zi pa paneegh tooni natŋa.
Pale rekia mon ve ivaghamun zi.

8 Saveeŋ sasaghati tau ivotvot ila avozi, ene pale imuul pa tauzi ve ivaghamun zi.
Ŋgar tau Maaron pale igham pazi na, pale tamtamon tighita, ve tililiit dabazi pazi ve tivelegh zi.

9 Ŋgar tau Maaron igham pazi na, ene pale igham tamtamon tisov tiroi, ve tigham ŋgar tiina pani, ve tisavia vaaru.
10 Tauvene zeran duduŋazi pale lolozi poia pa Yoova, ve tiyooŋ ila tooni.
Yes tau ŋgar duduuŋa igheen ariaaŋ ila lolozi na, pale tipaiti toman tintinizi.